मालेगाव तालुक्यात महिलासरपंचपद आरक्षण जाहिर.....दाभाडीसह  ६३ ग्रामपंचातींवर महिलाराज

सर्वसाधारण ३४, नामाप्र १७, अनु. जमाती ८ व अनु जातीसाठी ४ अशा एकूण ६३ जागा महिलांसाठी आरक्षित झाल्या 

मालेगाव : तालुक्यातील मुदत संपणाऱ्या १२५ ग्रामपंचायतींच्या सरपंचपदाचे आरक्षण जाहीर झाल्यानंतर बुधवारी (दि.३०) तहसील कार्यालयात उपविभागीय अधिकारी नितीन सदगीर यांच्या अध्यक्षतेखाली महिलांसाठी सरपंचपदाचे आरक्षण सोडत काढण्यात आली. यात सर्वसाधारण ३४, नामाप्र १७, अनु. जमाती ८ व अनु जातीसाठी ४ अशा एकूण ६३ जागा महिलांसाठी आरक्षित झाल्या आहेत.

बैठकीत तहसीलदार विशाल सोनवणे यांनी उपस्थितांना प्रोजेक्टद्वारे प्रत्येक गावाची माहिती व काढण्यात येणारे आरक्षण याची माहिती दिली. त्यानंतर उपविभागीय अधिकारी सदगीर यांच्या अध्यक्षतेखाली ५ मार्च २०२५ ते ४ मार्च २०३० या कालावधीसाठी १२५ ग्रामपंचातीं पैकी ६३ महिला सरपंचांच्या जागा आरक्षणनिहाय अंतिम करण्यात आल्या. शासनाकडून प्रवर्गनिहाय जागांची संख्या अंतिम केल्यानंतर बुधवारी प्रत्यक्षात गावनिहाय महिला सरपंचपदासाठी आरक्षण सोडत प्रक्रिया राबण्यात आली.

राजकीयदृष्ट्या जागृत असलेल्या दाभाडी, रावळगाव, कळवाडी, झोडगे, वडनेर आदींसह ६३ ग्रामपंचायतींना महिला सरपंचांसाठी आरक्षण निघाल्याने या ग्रामपंचायतींवर आता महिलाराज येणार आहे. या आरक्षणात अनुसूचित जातीतील आठपैकी चार जागा, अनुसूचित जमातीतील १६ पैकी आठ जागा, नागरिकांचा मागास प्रवर्गातील ३४ पैकी १७ जागा तर सर्वसाधारण प्रवर्गातील ६७ पैकी ३४ जागा महिलांसाठी आरक्षित झाल्या आहेत. या आरक्षणामुळे अनेकांना हायसे वाटले असले तरी मोठी गावे महिला राखीव झाल्याने अनेक मातब्बरांचा हिरमोड झाला आहे.

महिला सरपंचपदाचे आरक्षण

अनु. जाती : सातमाने, साकुरी (नि.), माल्हणगाव, चोंढी. 

अनु. जमाती :  सावतावाडी, ज्वार्डी (बु.) / ज्वार्डी (खु.), हिसवाळ, झोडगे, मेहुणे, खडकी, कंधाणे, एरंडगाव.

नागरिकांचा मागास प्रवर्ग : निळगव्हाण, दुंधे, टोकडे, शेंदुर्णी, चिंचवे (गा.), कळवाडी, गरबड, नागझरी, डाबली, चंदनपुरी, जळकू, नरडाणे, टेहरे, अस्ताणे, हाताणे, सायने (खु.), पाडळदे /सायतरपाडे

सर्वसाधारण : वडनेर, कंक्राळे, बेळगाव, खाकुर्डी, टाकळी, देवघट, कुकाणे, जाटपाडे, उंबरदे, देवारपाडे, वळवाडे, दापुरे, दसाणे, टिंघरी, येसगाव (खु.), खायदे, चिंचावड, आघार (बु.), दाभाडी, रावळगाव, लेंडाणे, पांढरुण, मोहपाडे, अजंग, आघार (खु.), गिलाणे, दहीवाळ बोधे, लोणवाडे, पाथर्डे, मळगाव, रोझे, कौळाणे (गा.), साकुर, वडगाव