🕉️ हर हर महादेव ! श्रावणाच्या पहिल्या सोमवार निमित्त मालेगाव शहरात कावड यात्रेचे भक्तिमय आयोजन

मालेगांव :- आज श्रावण महिन्याच्या पहिल्या सोमवार या पवित्र दिवशी मालेगाव शहरात श्री. विठ्ठलेश्वर महादेव मंदिर येथून महादेव मंदिर, गणेश कुंड, रामसेतू पुल मार्गे कावड यात्रेचे भव्य आयोजन करण्यात आले होते.

यावेळी शालेय शिक्षण मंत्री ना. श्री. दादाजी भुसे यांनी सहपत्नीक महादेवाची पूजा-अर्चना अत्यंत भक्तिभावाने केली. त्यांनी भगवान शिवचरणी सर्व भक्तांसाठी सुख, शांती आणि समृद्धीची प्रार्थना केली.

भक्तिपूर्ण वातावरणात निघालेल्या या यात्रेमध्ये असंख्य शिवभक्तांनी मोठ्या श्रद्धेने सहभाग नोंदवला. यात्रेची सुरुवात मंत्रोच्चार व भजनांच्या गजरात झाली. हातात कावड, कपाळावर भस्म, आणि ओठांवर "ॐ नमः शिवाय", "हर हर महादेव" अशा जयघोषांमुळे संपूर्ण वातावरण शिवमय झाले होते.

यात्रेदरम्यान संपूर्ण मार्ग भक्तिमय सजावट आणि श्रद्धेने भारलेला अनुभवला गेला. यात्रेच्या समारोपस्थळी महादेव मंदिरात सर्व शिवभक्तांनी गंगाजल अर्पण करून भगवान शिव शंकराचा अभिषेक व पूजन केले.

हा संपूर्ण क्षण उपस्थित भक्तांच्या मनात अविस्मरणीय व आध्यात्मिक ठसा उमटवणारा ठरला.ही यात्रा म्हणजे श्रद्धा, समर्पण आणि सांघिक एकतेचे प्रतीक ठरली. मालेगावकर शिवभक्तांनी आपल्या श्रद्धेचा सुरेख आविष्कार करत महादेवाच्या कृपेची अनुभूती घेतली.