मालेगाव तालुक्यातील पात्र लाभार्थ्यांना घरकुल योजनेचा लाभ द्यावा:शिक्षण मंत्री दादाजी भुसे... तालुक्यातील धरणे पूर पाण्याने भरण्यासाठी काटेकोरपणे नियोजन करावे : शिक्षणमंत्री दादाजी भुसे तालुक्यातील पिक- पाणी व टंचाई आढावा बैठक संपन्न

मालेगाव तालुक्यातील पात्र लाभार्थ्यांना घरकुल योजनेचा लाभ द्यावा:शिक्षण मंत्री दादाजी भुसे

मालेगाव, (उमाका वृत्तसेवा) :गोरगरीब व गरजूंना हक्काचे घर मिळावे, यासाठी शासन विविध कल्याणकारी योजना राबवित आहे. त्याअनुषंगाने प्रधानमंत्री आवास घरकुल योजनेच्या माध्यमातून मालेगाव तालुक्यातील पात्र लाभार्थींना घरकुल योजनांचा लाभ देण्यात यावा. एकही पात्र लाभार्थी घुरकुल योजनेपासून वंचित राहणार नाही, याची दक्षता घेण्याच्या सूचना राज्याचे शालेय शिक्षण मंत्री दादाजी भुसे यांनी संबंधित अधिकाऱ्यांना दिल्या.

शिक्षण मंत्री श्री. भुसे यांच्या उपस्थितीत शासकीय विश्रामगृह येथे मालेगाव तालुक्यातील पोटखराब वर्ग (अ) मधील क्षेत्र लागवडीखाली आणणेबाबत व प्रधानमंत्री आवास घरकुल योजनेंतर्गत मंजूर लाभार्थी घरकुल बाधंण्यासाठी स्वत:ची जागा नसल्याने त्यांना टेहरे शिवारातील ग्रामपंचायत गट नं. 217 मध्ये घरकुल बांधण्यासाठी परवानगीबाबत आढावा बैठक आयोजित करण्यात आली होती. त्यावेळी ते बोलत होते. यावेळी उप विभागीय अधिकारी नितीन सदगीर, तहसीलदार विशाल सोनवणे, गट विकास अधिकारी चंद्रकांत साबळे, उप प्रादेशिक परिवहन अधिकारी विनोद जाधव, नगररचना विभागाचे नगर रचनाकार अंकीत बुरड, कार्यकारी अभियंता मनोज डोके,महाराष्ट्र प्रदुषण मंडळाचे क्षेत्र अधिकारी म.अ. महाजन, भूमि अभिलेखचे उप अधीक्षक अल्पेश पाटील यांच्यासह विविध विभागाचे अधिकारी, सरपंच, तलाठी ,पदाधिकारी व नागरिक उपस्थित होते.

शिक्षण मंत्री श्री. भुसे म्हणाले की, तालुक्यातील पात्र लाभार्थ्यांना हक्काचे घर मिळावे म्हणून प्रधानमंत्री घरकूल आवास योजनेसंदर्भातील आवश्यक त्या उपाययोजना करुन घरकूल बांधकाम दर्जेदार होण्यासाठी नियोजनबध्द आराखडा तयार करावा. तसेच घरकुल पात्र लाभार्थ्यांचे प्रस्ताव तत्काळ मार्गी लावावेत, आवश्यक तेथील अतिक्रमणाबाबत आवश्यक त्या उपाययोजना कराव्यात आदी सुचना शिक्षण मंत्री श्री. भुसे यांनी संबंधित अधिका-यांना दिल्या. तसेच जास्तीत जास्त लोकांना या विविध घरकुल योजनांच्या माध्यमातून लाभ देण्यासाठी शासनस्तरावर नियोजन करण्यात आले आहे, असे त्यांनी यावेळी सांगितले.

 

शिक्षण मंत्री श्री. भुसे म्हणाले की, पोटखराबाखाली येणारी जमीन संबंधित जमीनधारकास कोणत्याही वेळी लागवडीखाली आणता येणार असून त्याची अतिरिक्त आकारणी करण्यात येणार आहे, असेही त्यांनी सांगितले. तसेच तालुक्यात प्रदुषणाचे प्रमाण वाढले असून त्यावर आवश्यक त्या उपाययोजना करण्यात याव्यात, अशा सूचनाही त्यांनी संबंधित विभागाच्या अधिकाऱ्यांना केल्या.

तालुक्यातील धरणे पूर पाण्याने भरण्यासाठी काटेकोरपणे नियोजन करावे : शिक्षणमंत्री दादाजी भुसे 

तालुक्यातील पिक- पाणी व टंचाई आढावा बैठक संपन्न

                                       

मालेगाव,  (उमाका वृत्तसेवा): तालुक्यातील नद्या पावसाच्या पाण्याने वाहत असून ते पाणी वाया न जावू देता जी धरणे अद्याप पुर्ण क्षमतेने भरलेले नाहीत ती धरणे पूर पाण्याने भरण्यासाठी काळजीपुर्वक व काटेकोरपणे नियोजन करावे, अशा सूचना राज्याचे शालेय शिक्षणमंत्री दादाजी भुसे यांनी संबंधित विभागाच्या अधिकाऱ्यांना दिल्या.

शिक्षणमंत्री दादाजी भुसे यांच्या उपस्थितीत शासकीय विश्रामगृह येथे मालेगाव तालुक्यातील पिक-पाणी व टंचाई आढावा बैठक आयोजित करण्यात आली होती. यावेळी उप विभागीय अधिकारी नितीन सदगिर, उपविभागीय कृषी अधिकारी संदीप मेढे, तहसिलदार विशाल सोनवणे, गट विकास अधिकारी चंद्रकांत साबळे, तालुका कृषी अधिकारी भगवान गोर्डे नगररचना विभागाचे नगर रचनाकार अंकीत बुरड, कार्यकारी अभियंता मनोज डोके,महाराष्ट्र प्रदुषण मंडळाचे क्षेत्र अधिकारी म.अ. महाजन, भमिअभिलेखचे उप अधिक्षक अल्पेश पाटील यांच्यासह विविध विभागाचे अधिकारी, सरपंच, तलाठी ,पदाधिकारी व नागरिक उपस्थित होते.

शिक्षणमंत्री दादाजी भुसे म्हणाले की, तालुक्यातील काही भागात पावसाचा खंड पडला आहे. त्याअनुषंगाने तालुक्यातील काही गावांना टँकरद्वारे पाणी पुरवठा होत आहे. तसेच ज्या गावांमध्ये विहिरी, बोअरवेल नादुरुस्त आहेत ते दुरुस्तीची मोहिम हाती घ्यावी. त्याचप्रमाणे गुरांना चारा, पिण्याच्या पाण्याचे, गावांना टँकर पुरवठा आदी कामांचे नियोजन काटेकोरपणे करावे, अशा सुचना शिक्षणमंत्री श्री. भुसे यांनी संबंधित विभागाला यावेळी दिल्या.

शिक्षणमंत्री श्री. भुसे पुढे म्हणाले की, पिक विमा योजनेंतर्गत प्रत्येक शेतकऱ्याने नुकसानीची तक्रार विमा कंपन्याना प्रशासनाच्या माध्यमातून तत्काळ करावी जेणेकरुन विमा कंपनीच्या माध्यमातून शेतकऱ्यांना दुष्काळी परिस्थितीत योग्य नुकसान भरपाई मिळण्यास या योजनेच्या माध्यमातून फायदा होईल. तसेच जास्तीत जास्त शेतकऱ्यांनी विहीत मुदतीत ई-पिक नोंदणी करुन सहभागी व्हावे, असे आवाहन शिक्षणमंत्री श्री. भुसे यांनी केले.

तालुक्यात पुरेशा प्रमाणात खते उपलब्ध असून आवश्यकतेनुसार युरिया व रासायनिक खतांचा वापर करावा. तसेच पिकांचे पाण्याअभावी नुकसान होवू नये व पिकांना पुरेशे पाणी उपलब्ध होण्यासाठी विज कंपनीने विज पुरवठा सुरळीत ठेवण्याचे नियोजन करावे, अशा सुचना यावेळी शिक्षणमंत्री श्री. भुसे यांनी संबंधित अधिकाऱ्यांना दिल्या.